சிறப்பு - கவிதை மற்றும் உரை

சிறப்பு

அன்பின் சிறப்பு

கண்ணீரைத் தருதல்

அறிவின் சிறப்பு

அமைதியாய் இருத்தல்

தாயின் சிறப்பு

பசியை களைதல்

தந்தையின் சிறப்பு

நேர்வழி புகட்டல் 

குருவின் சிறப்பு

குற்றத்தை குறைத்தல்

இறையின் சிறப்பு

நல்லவன் ஆக்கல்

நட்பின் சிறப்பு

பொறாமை தவிர்த்தல்

தோழனின் சிறப்பு

கவலையை தடுத்தல்

தோழியின் சிறப்பு

தோல்வியை தேற்றல்

இன்பத்தின் சிறப்பு

துன்பத்தை மறத்தல்

துன்பத்தின் சிறப்பு

இன்பத்தை நினைத்தல்

நுண்மையின் சிறப்பு

சான்றோரை கவர்தல்

உண்மையின் சிறப்பு

உறுதிபட உரைத்தல்

பெருமையின் சிறப்பு

பிறரதை மொழிதல்

தானத்தின் சிறப்பு

சொல்லாது இருத்தல்

கானத்தின் சிறப்பு

இன்பத்தை அளித்தல்

நூலின் சிறப்பு

நுவல்வோன் தெளிதல்

கோலின் சிறப்பு

நேர்மை வரைதல்

கல்வியின் சிறப்பு

உண்மையை அறிதல்

கேள்வியின் சிறப்பு

உண்மையை ஆய்தல்

அறத்தின் சிறப்பு

அதன்படி நடத்தல்

பொருளின் சிறப்பு

இல்லார்க்கு ஈதல்

இன்பத்தின் சிறப்பு

கூடி மகிழ்தல்

துறவின் சிறப்பு

ஒன்றென உணர்தல்

உறவின் சிறப்பு

நலமா கேட்டல்

தனிமையின் சிறப்பு

கடந்ததை நினைத்தல்

நினைவின் சிறப்பு

நிஜத்தை மறத்தல்

உழைப்பின் சிறப்பு

உடலைப் பேணல்

தொழிலின் சிறப்பு

உள்ளத்தைப் பேணல்

மண்ணின் சிறப்பு

இயற்கை விளைத்தல்

மழையின் சிறப்பு

வெயிலோடு தூறல்

வானின் சிறப்பு

இரவை மகிழ்தல்

உழவின் சிறப்பு

பிறர்பசி ஆற்றல்

உணவின் சிறப்பு

வயிற்றுக்கு அளித்தல்

ஆண்மையின் சிறப்பு

பெண்மையை போற்றல்

பெண்மையின் சிறப்பு

தாய்மையை ஏற்றல்

ஆணின் சிறப்பு

அடங்காமை தவிர்த்தல்

பெண்ணின் சிறப்பு

அடக்கமாய் இருத்தல்

இருபால் சிறப்பு

கற்பைக் காத்தல்

குழவியின் சிறப்பு

மழலையின் புலம்பல்

காதலின் சிறப்பு

களவினால் காணல்

காலத்தின் சிறப்பு

நிற்காது போதல்

மானத்தின் சிறப்பு

உயிராக போற்றல்

வெற்றியின் சிறப்பு

மயங்காது இருத்தல்

தோல்வியின் சிறப்பு

கலங்காது இருத்தல்

முயற்சியின் சிறப்பு

முடிவதை ஆக்கல்

பயிற்சியின் சிறப்பு

பயத்தை நீக்கல்

மனதின் சிறப்பு

புத்துலகம் படைத்தல்

மனிதனின் சிறப்பு

பிரிவினை உடைத்தல்

வாழ்க்கையின் சிறப்பு

முழுதாய் வாழ்தல்

அதனினும் சிறப்பு

பிறர்கென வாழ்தல்

 

என்னுரை: அன்பின் சிறப்பானது அடக்கமுடியாத கண்ணீரினால் வெளிப்படுகிறது, அறிவின் சிறப்பானது எத்தனை சிக்கலான சமயத்திலும் அமைதியை கொடுக்க வல்லது, தாயின் சிறப்பானது பிள்ளையின் பசியறிந்து பசி களைதல், தந்தையின் சிறப்பானது பிள்ளைக்கு நேர்மையை தருதலாகும், குருவின் சிறப்பு ஒழுக்கத்தை தந்து குற்றத்தை குறைத்தல் ஆகும், இறையின் சிறப்பு அறத்தினை கொடுத்து நல்லவன் ஆக்கும், நட்பின் சிறப்பு பொறாமையை தவிர்த்து நடத்தலாகும், தோழனின் சிறப்பு என்றும் மகிழ்ச்சியை தருதலாகும், தோழியின் சிறப்பு இன்பமான வார்த்தைகளைக் கூறி நம் தோல்வியினை மரக்க வைத்தலாகும், இன்பத்தின் சிறப்பு துன்பத்தை நினைவிலிருந்து அழிந்துவிடும் துன்பத்தின் சிறப்பு இன்பத்தையே நினைக்க வைக்கும், மிக நுண்ணிய காரியங்களின் சிறப்பு அறிவுடைய சான்றோர்களை கவர்தல் ஆகும், உண்மையின் சிறப்பு பயமின்றி உறுதிபட உரைத்தல் ஆகும், புகழ் பெருமையின் சிறப்பு பிறர் அதை பலரிடம் உரைத்தல் ஆகும், தானத்தின் சிறப்பு தந்ததை சொல்லி காட்டாமல் இருப்பதாகும், கானத்தின் சிறப்பு கேட்டோர் நன்றென மொழிதலாகும் அது இன்பத்தை தரும், நூலினது சிறப்பு அதை படிப்போரை தெளிய வைத்தலாகும், கோலின் சிறப்பு அது செங்கோல் ஆனாலும் எழுதுகோல் ஆனாலும் நேர்மையை வரைதல் ஆகும், கல்வியின் சிறப்பு உண்மையை அறிதல் ஆகும் கேள்வியின் சிறப்பு அந்த உண்மையை ஆய்ந்து அறிதல் ஆகும், அறத்தின் சிறப்பு அதன்படி நடத்தல் ஆகும் பொருளின் சிறப்பு இல்லாதோருக்கு அளித்தல் ஆகும் இன்பத்தின் சிறப்பு மனம் கூடி மகிழ்தல் ஆகும், துறவின் சிறப்பு அனைத்தும் ஒன்றே என நினைத்தலாகும், உறவின் சிறப்பு பார்க்கும்போதெல்லாம் நலமாய் இருக்கிறீர்களா என கேட்பது ஆகும், தனிமையின் சிறப்பு நினைவு ஏடுகளைப் புரட்டிப் பார்ப்பதாகும், அந்த நினைவின் சிறப்பு நிஜத்தை மறக்கடித்தல் ஆகும், உழைப்பின் சிறப்பு தசை போர்த்திய உடலை பாதுகாப்பதற்காகவும் தொழிலின் சிறப்பு அலைபாயும் மனதை பாதுகாப்பதற்காகவும் ஆகும். உலக மண்ணின் சிறப்பு இங்குள்ள இயற்கையை விளைவிப்பதாகும், மழையின் சிறப்பு வெயிலோடு இருக்கும்போதே தூரல் போடுவதாகும், வானின் சிறப்பு இரவினை தனிமையில் மகிழ்தல் ஆகும், உழவின் சிறப்பு உலகோர் பசியை தீர்ப்பதாகும், உணவின் சிறப்பு நாக்குக்காக அல்லாமல் வயிற்றுக்காக எடுப்பதாகும், ஆண்மையின் சிறப்பு பெண்மையை தூற்றாது இருப்பதாகும், பெண்மையின் சிறப்பு தாய்மையை எற்பதாகும், ஆணின் சிறப்பு அடங்காமை இல்லாமல் இருப்பதாகும், பெண்ணின் சிறப்பு அடக்கமாய் இருப்பதாகும், இருபாலோரின் சிறப்பு கற்பை காத்தலாகும், குழந்தையின் சிறப்பு மழலையின் புலம்பலில் அறியலாம். காதலின் சிறப்பு தலைவியை களவுக் கொண்டு காண்பதாகும், காலத்தின் சிறப்பு எவருக்கும் பணியாது இருத்தலாகும், மானத்தின் சிறப்பு உயிராக போற்றுதலாகும், வெற்றியின் சிறப்பு உச்சத்தை கண்டு மயங்காது இருத்தல் தோல்வியின் சிறப்பு கீழ்மையைக் கண்டு கலங்காது இருத்தல், முயற்சியின் சிறப்பு முடிந்ததை செய்து முடிப்பது, பயற்சியின் சிறப்பு அதை பயமின்றி செய்ய வைப்பது, மனதின் சிறப்பு சோகத்திலும் புத்துணர்வு தந்து வேறு கண்ணோட்டத்தில் உலகைக்காண வைப்பது, மனிதனின் சிறப்பு பிரிவின்றி ஒற்றுமையை வாழ்வது, வாழ்க்கையின் சிறப்பு இடை நிற்காமல் முழுதாய் வாழ்ந்து முடிப்பது, அதனினும் சிறப்பு பிறர்க்கென்றே வாழ்ந்து முடிப்பது

தீசன்